Röya və Zamiqin "Doğma diyar" konsert turunun növbəti dayanacağı Şirvan şəhəri olub

Populyar müğənnilər Röya və Zamiqin “Doğma diyar” konsert turunun növbəti dayanacağı Şirvan olub. Müğənnilər dünən Şirvanın mərkəzindəki Heydər Əliyev adına Meydanda açıq havada konsert proqramı ilə çıxış edib. 2,5 saatlıq konsertdə ənənəvi olaraq Samir Bayramlı və Sevinc Ağaşirinova aparıcılıq missiyasını yerinə yetirib.

15 mindən çox tamaşaçının izlədiyi konsertdə Röya və Zamiqi razı salan bir sıra maraqlı məqamlar olub. “Röyayam” mahnısının ifası zamanı yaşlı kişi səhnəyə çıxaraq Röya Ayxanının yanında qol qaldırıb oxuyub, müğənnini ifası ilə müşayiət edib. Müğənni qeyri-adi sevgi qarşısında özünü itirib.

Şirvan şəhəri turne müddətində sənətçilərə ən bahalı hədiyyələr və gül dəstələri təqdim edən məkan kimi də yadda qalıb. Rayon rəhbərliyi səhnə arxasında bütün təşkilatçılar, heyət üçün gözəl süfrə açıb.

Qeyd edək ki, konsert turu 12 iyul tarixində Qubada başlayıb və artıq Qəbələ, Göyçay, Mingəçevir, Zaqatala, Qazax, Tovuz, Ağdam, Füzuli şəhərlərində keçirilib. Azərbaycanın 15 bölgəsində keçirilən “Doğma diyar” konsert turunun baş sponsoru “NarMobile” şirkətidir. Konsertlərdə iştirak edən sakinlər "NarMobile"dan bir çox bonus qazanmaq imkanı və yeni kampaniyalar haqqında məlumat əldə edir. Belə ki, konsert zamanı SMS viktorinada iştirak edən və sualın düzgün cavabını 1111 nömrəsinə göndərən abunəçilər mobil telefonları qazanmaq şansını əldə edir.

"NarMobile"ın sponsorluğu, “Ulduz” prodakşnın təşkilatçılığı, Mədəniyyət və Turizm Nazirliyi dəstəyi ilə keçirilən “Doğma diyar” layihəsinin informasiya dəstəyi “Röya” jurnalına, eksklüziv yayım hüququ isə “Lider TV”yə məxsudur.

"Doğma diyar" layihəsinin növbəti konserti avqustun 19-da Lənkəranda baş tutacaq.