Bakıda bilik yarışı keçiriləcək

28 May Respublika günü münasibətilə Bakıda bilik yarışı keçiriləcək. Gənclər və İdman Nazirliyindən verilən məlumata görə, Bakı şəhərində fəaliyyət göstərən 25 ali təhsil müəssisəsindən 150 gənc qalibiyyət uğrunda intellekt mübarizəsinə qoşulacaq. “Nə? Harada? Nə zaman?” intellektual yarışması may ayının 19-da “Hyatt Regency” mehmanxanasında Gənclər və İdman Nazirliyi, Azərbaycan Tələbə Gənclər Təşkilatları İttifaqı ilə birlikdə təşkil ediləcək.

Qeyd edək ki, tədbirin keçirilməsində əsas məqsəd 28 May Respublika gününü geniş qeyd etmək, gənclər arasında Azərbaycan tarixini təbliğ etmək, onların siyasi dünyagörüşünün formalaşmasını istiqamətləndirmək, habelə, siyasi biliklərini, intellektual qabiliyyətlərini nümayiş etdirmələrinə şərait yaratmaqdır.

Yarışmada iştirakçılara təqdim ediləcək suallar Azərbaycan tarixini, mədəniyyətini, incəsənətini, habelə, dünya tarixini də əhatə edəcək.