Litvanın paytaxtı Vilnüsdə keçirilən sərbəst, yunan-Roma və qadın güləşi üzrə Avropa çempionatına yekun vurulub.

Lent.az-ın məlumatına görə, yarışda çıxış edən Azərbaycan milli komandası 5 qızıl, 2 gümüş, 2 bürünc medal qazanıb.

Yığmamız ən çox medala sərbəst güləş növündə sahib çıxıb. Komandamızın üzvlərindən Zəlimxan Hüseynov (60 kq), Çamsulvara Çamsulvarayev (74 kq), Xetaq Qazyumov (96 kq) və Əli İsayev (120 kq) qızıl, Cəbrayıl Həsənov (60 kq) gümüş, Novruz Temrezov (84 kq) isə bürünc medala layiq görülüb. Bu nəticə ilə ölkəmiz ümumi hesabda 1-ci yeri tutub.

Qadın güləşçilərimizdən Mariya Stadnik (48 kq) qızıl medal qazanaraq, ardıcıl ikinci dəfə Avropa çempionu olub. Zümrüd Qurbanhacıyeva (67 kq) isə gümüş medalla kifayətlənib. Ümumi hesabda komandamız 5-ci olub.

Pəhləvanlarımız ən zəif nəticəni yunan-Roma güləşində qazanıblar. Qitə çempionatında çıxış edən 6 “klassik” güləşçimizdən yalnız Şalva Qadabadze (84 kq) bürünc medal qazanıb. Nəticədə komandamız Ermənistanla birgə 3-4-cü yerləri bölüşdürüb.