Insanın beynini tədqiq edən Nyu-Yorkdakı Binghamton Universitetinin alimi Endryu Qəllop belə bir nəticəyə gəlib:  "İnsan ona görə əsnəyir ki, onun beyni qızır".
"Beyni qızmaq" Azərbaycan dilində bir qədər başqa məna daşıyır. Amma Qəllopun «qızmar beyin» məhfumu sadəcə beyin toxumalarının fiziki hərarətinin dəyişməsini nəzərdə tutur.
Bu haqda xəbər verən Discovery.com saytı beynin fəaliyyətini kompüterin hard diskinə bənzədir və yazır ki, gərginlik keçirən insan beyninin hərarəti qalxır. Onu sərinləşdirmək üçün insan başlayır əsnəməyə - sərin havanı kəllə qutusunun ənginliyinə sovurmağa.
Beynin hərarətini ən çox qaldıran isə yuxusuzluqdur. Ona görə də yuxusuzluqdan sonra adamın az qalır çənəsı yerindən çıxsın.
Yaxşı deyiblər ki, 100 il yaşa, 100 il öyrən.
Belə çıxır ki, kimsə əsnəyirsə, deməli, onun pis və ya yaxşı beyni var. Beyinsiz adam heç vaxt əsnəmir.
Ümid edirik ki, bu xəbər televiziya həmkarlarımıza çatacaq. Çünki onlar əhəmiyyəti adi vətəndaşdan çox olan adamları ekranlarda göstərəndə əsnəmək kadrlarını kəsib atırlar.

Heç TV-də əsnəyən siyasətçi görmüsünüz?