Qarşılaşmanın favoriti sayılan “İnter” Madrid klubuna məğlub oldu

Avropa Liqasının qalibi, İspaniyanın “Atletiko” klubu Çempionlar Liqasının qalibi, İtaliyanın “İnter” komandasını 2:0 hesabı ilə məğlub edərək, UEFA Superkubokunu qazanıb. Oyun Monakodakı “Lui II” stadionunda keçirilib.

Komandalar qarşılaşmaya normal templə başlayıblar. Birinci hissənin ortalarında oyun sakit məcraya keçib, qarşılaşmanın favoriti hesab olunan “İnter” isə təşəbbüsü rəqibə verib. Heyətində Serxio Aqueronun daha fəal oluduğu “Atletiko” Julio Sezarın qoruduğu qapının önündə bir neçə təhlükəli vəziyyət yaradıb. Lakin birinci hissədə qapılara qol vurulmayıb.

Fasilədən sonra oyunun xarakteri dəyişməyib və madridlilər 62-ci dəqiqədə hesabda irəli çıxıblar. Xose Anitonio Reyes qol vurmaq üçün iki imkan əldə edib. Birinci vəziyyətdə Julio Sezar qapısının toxunulmazlığını qoruya bilsə də, cəmi bir neçə dəqiqə sonra ispan futbolçu qapının yaxın küncünü dəqiq nişan alıb.

Qoldan sonra “İnter” tədricə təşəbbüsü ələ almağa başlayıb. Lakin əks-hücumlara üstünlük verən “Atletiko” hesab arasında fərqi artıra bilib. Simau sol cinahdan cərimə meydançasına ötürmə edib və Serxio Aquero topu boş qapıya göndərib.

“İnter” oyunun sonunda təsəlli qolunu vura bilərdi. Lakin Diyeqo Milito 90-cı dəqiqədə 11 metrlik cərimə zərbəsini qola çevirə bilməyib. “Atletiko”nun 19 yaşlı qapıçısı David de Xea gözəl sıçrayışla qola imkan verməyib.