Məzunlar ölkənin adını her yerdə ucaldacaqlarına söz veriblər Bu il Türkiyənin müxtəlif universitetlərində təhsil alan təxminən 200 azərbaycanlı gənc məzun adını qazanıb. Onlardan bəziləri Türkiyənin ən nüfuzlu universitetlərinin tarixində indiyə qədər görünməmiş yüksək bal toplayıb. Ankarada keçirilən buraxılış tədbirləri çərçivəsində azərbaycanlı məzunlar Vətənə sədaqət andı içib və hər zaman qulluq edəcəklərinə, eləcə də ölkənin adını her yerdə ucaldacaqlarına söz verib. Azərbaycanın Ankaradakı səfirliyindən ANS PRESS-ə verilən məlumata görə, Türkiyənin müxtəlif universitetlərindən məzun olan azərbaycanlı gənclərin buraxılış mərasimi ilə bağlı tədbirlər Ankaradakı Heydər Əliyev parkından başlayıb. Azərbaycanlı məzunlar ulu öndərin xatirəsini ehtiramla yad edib.
"Palmali Şirkətlər Qrupu"nun prezidenti Mübariz Mənsimovun rəhbərlik etdiyi "Azərbaycan Mədəniyyət və Həmrəylik Dərnəyi"nin dəstəyi ilə Azərbaycanın Ankaradakı səfirliyində təşkil edilən tədbirdə səfir Zakir Həşimov, ölkənin təhsil nazirliyi və ali təhsil qurumunun rəhbərləri, nüfuzlu universitetlərin professorları iştirak edib. Ankara, İstanbul, İzmir, Bursa, Konya, Eskişehir və digər şəhərlərdəki universitetlərdə təhsillərini uğurla başa çatdıran azərbaycanlı məzunlar əvvəl Türkiyə, daha sonra Azərbaycan himnini səsləndirib.
Azərbaycanın Ankaradakı səfiri Zakir Həşimov məzunları təbrik edərək, onlara ölkəmizin daha da çiçəklənməsi yolundakı fəaliyyətlərində uğurlar arzulayıb. Orta Doğu Texnik Universitetini bitirən Orxan Salmanlı Türkiyədə təhsil almaları üçün yaradılan şəraitə görə, Azərbaycan və Türkiyə dövlətlərinə, eləcə də universitet müəllimlərinə bütün məzunlar adından minnətdarlığını bildirib.
"Azərbaycan Mədəniyyət və Həmrəylik Dərnəyi"nin dəstəyi ilə keçirilən buraxılış tədbirləri məzunlar üçün təşkil edilən ziyafətlə davam edib. Məzunlar İradə İbrahimovanın mahnıları ilə şənliyi davam etdirib. Burada "Azərbaycan Mədəniyyət və Həmrəylik Dərnəyi"nin məzunlara xüsusi hədiyyələri paylanılıb.