Təranə Hacıyeva: “Hər valideyn əmin ola bilər ki, onun övladı hamı üçün yaradılan şəraitdən bərabər şəkildə yararlanaraq imtahan verir və biliyinə uyğun qiymət alır”

Regionlarda orta məktəblərin buraxılış siniflərinin şagirdləri üçün keçirilmiş imtahanların nəticələri göstərir ki, builki nəticələr əvvəlki illərdən təxminən 15 faiz yüksəkdir.

Lent.az-ın məlumatına görə, Təhsil Nazirliyinin şagird nailiyyətlərinin qiymətləndirilməsi şöbəsinin müdiri Təranə Hacıyeva jurnalistlərə açıqlamasında belə deyib. O qeyd edib ki, şagirdlərin əvvəlki illərlə müqayisədə daha yaxşı nəticə göstərə bilməsi imtahanın təşkilində aparılan yeniliklərin bəhrəsidir: “Biz imtahanın məzmununda heç bir dəyişiklik etməmişik. Lakin imtahanın təşkili ilə bağlı bəzi nəzarət tədbirləri var ki, onlar da valideynlərin bu imtahanları müşahidə etməsi üçün yaradılan şəraitlə əlaqədardır. Məsələn, Valideyn-Müəllim Assosiasiyanın üzvlərinin buraxılış imtahanlarına nəzarət etməsi, imtahan mərkəzlərində olması, şagirdlərin necə imtahan verməsini izləmələri və digər valideynlərində bu barədə məlumatlandırılması imtahanın gedişinə çox müsbət təsir edir. Artıq hər valideyn əmin ola bilər ki, onun övladı hamı üçün yaradılan şəraitdən bərabər şəkildə yararlanaraq imtahan verir və biliyinə uyğun qiymət alır”.

İmtahan nəticələrinin nə vaxt elan olunacağına gəlincə, Təranə Hacıyeva bunun yaxın bir həftəyə mümkün olacağını deyib. Şöbə müdiri bildirib ki, iyunun 18-də 9-cu siniflər üzrə keçiriləcək imtahanla builki imtahan mövsümünə yekun vurulacaq. Bundan bir neçə gün sonra isə respublika üzrə 9 və 11-ci sinif şagirdlərinin imtahan nəticələri elan olunacaq.