Prokurorluq bələdiyyədə korrupsiya faktları aşkarlayıb.Bakının Səbail rayon bələdiyyəsinin sədri həbs edilib.

Bakının Səbail rayon bələdiyyəsində korrupsiya faktı aşkar edilib. Bu barədə Baş Prokurorluğun mətbuat xidmətindən məlumat verilib. Məlumata görə, vətəndaş Almas Xəlilov və Arif Şamilov martın 28-də “Qaynar xətt” əlaqə mərkəzinə müraciət edərək, Səbail rayonu ərazisində torpaq sahəsi ilə təmin edilmələri barədə məhkəmə tərəfindən 2007-ci il iyulun 3-də qətnamə qəbul edildiyi halda, Səbail bələdiyyəsinin sədri Mübariz İbrahimovun, bələdiyyənin hüquqşünası Arif Əlizadə və bələdiyyənin Ərazi Tikinti Torpaq Komissiyasının sədr müavini Cavid Həsənovun vasitəsilə bələdiyyənin xidməti ərazisindən fərdi yaşayış evinin tikintisi üçün 0,06 ha torpaq sahəsi ayrılmasına görə onların hər birindən 5 min manat olmaqla, cəmi 10 min manat pulu rüşvət kimi istəmələrini və tələb olunan rüşvətin müqabilində 8 min manat pulu vermələri barədə bələdiyyənin vəzifəli şəxsləri ilə razılaşdıqlarını bildirib.

Müraciətin araşdırılması ilə əlaqədar martın 29-da saat 12 radələrində Baş prokuror yanında Korrupsiyaya Qarşı Mübarizə İdarəsinin əməkdaşları Səbail bələdiyyəsinin yerləşdiyi Bakı şəhəri, Əlibəyov qardaşları 61 saylı ünvana gəlib və şikayətçilər bələdiyyənin inzibati binasından çıxdıqdan sonra Almaz Xəlilov 8 min manat məbləğində pulu bələdiyyənin hüquqşünası Arif Əlizadəyə sonuncunun öz otağında verdiyini bildirdiyindən binaya baxış keçirilib.

Hal şahidlərinin iştirakı ilə Səbail bələdiyyəsinin sədr müavini Əliyar Fərzəliyevin iş otağında keçirilmiş baxış zamanı həmin vaxt otaqda olan Arif Əlizadənin istilik radiatorunun üzərinə qoyduğu qəzet parçasına bükülmüş vəziyyətdə şikayətçilərin prokurorluq orqanlarına müraciəti üzrə protokolla rəsmiləşdirilmiş seriya və nömrələri ilə eynilik təşkil edən 100 (yüz) və 50 (əlli) manatlıq əskinazlardan ibarət 8 min manat məbləğində pul aşkar edilərək götürülüb.

Toplanmış materiallar əsasında martın 29-da Səbail bələdiyyəsinin vəzifəli şəxsləri barəsində Cinayət Məcəlləsinin 311.3.1 və 311.3.3-cü (qabaqcadan əlbir olan bir qrup şəxs tərəfindən külli miqdarda rüşvət alma) maddələri ilə cinayət işi başlanıb.

Araşdırmalarla həmçinin müəyyən edilib ki, Mübariz İbrahimov həmin vəzifədə işləyərkən Ədliyyə Nazirliyinin Səbail rayon məhkəmə qərarlarının icrası şöbəsinin dəfələrlə etdiyi xəbərdarlıqlarına baxmayaraq, Səbail rayon məhkəməsinin həmin bələdiyyənin üzərinə Almas Xəlilov və Arif Şamilova fərdi yaşayış evinin tikintisi üçün müəyyən olunmuş qaydada torpaq sahəsinin ayrılması vəzifəsinin qoyulması barədə qanuni qüvvəyə minmiş 2007-ci il 3 iyul tarixli qətnaməsini qərəzli olaraq icra etməyib.

Törətdiyi cinayət əməllərinə görə Cavid Həsənov və Arif Əlizadə qabaqcadan əlbir olan bir qrup şəxs tərəfindən külli miqdarda rüşvət almağa görə Cinayət Məcəlləsinin 311.3.1 və 311.3.3-cü maddələri, Mübariz İbrahimov isə qeyd olunan maddələrlə yanaşı, vəzifəli şəxs tərəfindən məhkəmə qərarını icra etməməyə görə məsuliyyət nəzərdə tutan Cinayət Məcəlləsinin 306.2-ci (vəzifəli şəxs tərəfindən məhkəmə hökmünü, qərarını icra etməmə) maddəsi ilə təqsirləndirilən şəxs qismində cəlb edilərək barələrində məhkəmənin qərarı ilə həbs qətimkan tədbiri seçilib.

Mühəndis rüşvət alarkən həbs edilib
Cinayət törətmiş şəxs ifşa edilərək məsuliyyətə cəlb olunub

Yasamal rayonu, 60 saylı Mənzil-Kommunal İstismar Sahəsinin mühəndisi Bərşad Mahmudov korrupsiya faktı ilə əlaqədar həbs edilib. Bu barədə Baş Prokurorluğun mətbuat xidmətindən bildirilib.

Məlumata görə, vətəndaş İlqar İsmayılovun, anası Hicran İsmayılovaya xidməti yaşayış sahəsi kimi verilmiş mənzilin özəlləşdirilməsinə kömək etmək məqsədi ilə ondan 3 min manat rüşvət tələb edilməsi barədə martın 29-da “Qaynar xətt” əlaqə mərkəzinə etdiyi müraciəti üzrə təxirəsalınmaz tədbirlər həyata keçirilib, cinayət törətmiş şəxs ifşa edilərək məsuliyyətə cəlb olunub. Belə ki, Yasamal rayonu, 60 saylı Mənzil-Kommunal İstismar Sahəsinin mühəndisi Bərşad Mahmudov həmin sahənin xidməti ərazisində C.Məmmədquluzadə küçəsi 11 saylı ünvanda yerləşən xidməti mənzilin 3 min manat müqabilində Hicran İsmayılovanın adına özəlləşdirilməsini təşkil etmək barədə İlqar İsmayılovla əvvəlcədən razılığa gələrək, pulun bir hissəsini qabaqcadan almağı planlaşdırıb.

Bərşad Mahmudov martın 29-da Bakı şəhərində, idarə etdiyi “Mercedes-Benz” markalı 10 SZ 063 dövlət qeydiyyat nişanlı avtomaşının salonunda İlqar İsmayılovla görüşərək ondan 1.600 manat rüşvət alarkən yaxalanıb.

Faktla bağlı Cinayət Məcəlləsinin 311.2-ci (vəzifəli şəxs tərəfindən qanunsuz hərəkətlərə görə rüşvət alma) maddəsi ilə cinayət işi başlanıb və törətdiyi cinayət əməlinə görə Bərşad Mahmudova qeyd edilən maddədə nəzərdə tutulan ittiham elan edilərək təqsirləndirilən şəxs qismində cəlb olunmaqla barəsində məhkəmənin qərarı ilə həbs qətimkan tədbiri seçilib.