Əlilliyə qarşı stiqma kampaniyası başlayıb

Bakıda "İnsanlığa hörmət edək” adlı əlilliyə qarşı stiqma kampaniyasına start verilib. Azərbaycana Birgə Yardım Təşkilatının icimaiyyətlə əlaqələr xidmətinin məlumatına görə, layihə iki ay davam edəcək. Layihə Azərbaycana Birgə Yardımın təşkilatçılığı, Avropa Birliyi və Müasir Təhsil və Tədrisə Yardım Mərkəzinin dəstəyi ilə reallaşır. “İnsanlığa hörmət edək” adlı kampaniyanın gələcəkdə regionlarda da davam etdirilməsi nəzərdə tutulur.

Qeyd edək ki, müxtəlif növ əlilliyi olan insanlar cəmiyyətdə stiqmaya məruz qalır. Stiqma adətən ailədən başlayır, bəzən valideynlər əlilliyi olan övladlarını cəmiyyətdən belə gizlədir. Əlilliyi olan insanlara qarşı ayrı-seçkilik göstərilərək, onlara şikəst, lal, kar, kor, əlil, debil və s. deyə müraciət olunur. Azərbaycana Birgə Yardım təşkilatının bu layihəni həyata keçirməkdə əsas məqsədi BMT-nin Əlilliyi olan İnsanların Hüquqları haqda Konvensiyanın tələblərinə uyğun olaraq cəmiyyətə əlilliyi olan insanlara düzgün müraciət formalarını çatdırmaq, dolayısı ilə əlilliyi olan insanlara qarşı ayrı-seçkiliyi aradan qaldırmaq, onlar haqda müsbət imicin formalaşmasına nail olmaqdır.