Tacir Şahmalıoğlunun ifası “YouTube” videoportalında yerləşdirilib

Tanınmış müğənni Tacir Şahmalıoğlunun “YouTube” videoportalında şok videosu yayılıb. Videoda əslən qarabağlı olan müğənni erməni ifaçı ilə eyni səhnəni bölüşərək, muğam oxuyur. “MrHaymuz” adlı erməni istifadəçi tərəfindən videoportala yerləşdirilən videoçarxda erməni müğənninin adı Vle Kolayan, məclisin baş tutduğu ünvan isə “Ocaq” restoranı kimi göstərilib.

Ancaq müğənni "Yeni Müsavat" qəzetinə bildirib ki, hadisə 2010-cu ildən 2011-ci ilə keçən gecə, dekabrın 31-də baş verib: “Dünya Azərbaycanlılarının həmrəylik günündə Moskvada yerləşən ”Prestij" restoranına dəvət olunmuşdum. Ora “Ocaq” restoranı deyildi. Saytlarda restoranın adı da səhv yazılıb. Mən olduğum “Prestij” restoranı da Nazim adlı azərbaycanlı iş adamına məxsusdur. O, əslən Gədəbəydəndir, biznesmendir. Tədbirdə məlum oldu ki, orada müxtəlif xalqların nümayəndələri var. Bəli, o məclisdə kürdlər və ermənilər də olub. Erməni müğənni bizim mahnını erməni avazı ilə oxuyurdu. Ermənicə oxuduğu mahnını öz musiqiləri kimi təqdim etdi. Mən də orada başqa hərəkət edə bilməzdim. Mən də bir xalqın mədəniyyətini təmsil edən şəxs olaraq həmin mahnını azərbaycanca oxudum. Deyirlər ki, mədəniyyət ən böyük siyasətdir və mən bu siyasətdən çıxış edərək öz mahnımızı öz dilimizdə oxuyaraq cavab vermişəm. Qaldı ki, orada bir neçə şəxs var. Onlardan biri kürd idi. Mən oradan cavabsız çıxsaydım, bu, bir qəbahət olardı. Sivil yolla Azərbaycan dilində mahnı oxuyub qarşı tərəfin cavabını verdim".

Qeyd edək ki, videoda müğənninin erməni həmkarı ilə duet oxuduğu açıq-aşkar görünür.
ANS PRESS olaraq müğənni Tacir Şahmalıoğlu ilə ilə əlaqə saxlayaraq mövzu ilə bağlı onun fikirlərini öyrənməyə cəhd etdik. Müğənninin telefonu qapalı olduğundan onun münasibətini öyrənmək cəhdlərimiz baş tutmadı.

Uşaq yaşlarında “Qarabağ bülbülləri” qrupunun tərkibində unudulmaz şəkildə “Bayatı Şiraz” muğamını ifa edən müğənninin belə addım atması xüsusilə ağrıdıcı faktdır. Axı bu müğənninin ifası demək olar ki, bütün telekanallarda Qarabağın ermənilər tərəfindən işğalı ilə bağlı hazırlanan reportajları bəzəyir. Müğənninin ifa etdiyi “Bayatı Şiraz” hətta dahi bəstəkarımız Üzeyir Hacıbəyovun həyatına həsr edilmiş “Üzeyir ömrü” bədii filmində də yer alıb.

Bildiyimizə görə, Tacirin özü Azərbaycanın hazırda işağl altında olan Ağdam rayonunda anadan olub.

Belə bir müğənninin bu addımı atması çox böyük təəssüf hissi doğurur. Mövzuya qayıdacağıq.

Tacir danışdı: O, erməni yox, kürddür

Müğənni Tacir Şahmalıoğlu Moskvadakı restoranlardan birində erməni müğənni ilə mahnı oxuması ilə bağlı internetdə yayılan videogörüntülərə ANS-in efirində cavab verib. ANS telekanalında qonaq olan müğənni bildirib ki, sözügedən videoçarx ötən ilin sonunda çəkilib. Tacirin sözlərinə görə, o, Moskvadakı “Ocaq” restoranında Yeni il münasibətilə keçirilən tədbirə dəvət olunub və orada iştirak edib. Ziyafətdə bir erməni müğənni Azərbaycan mahnısını ifadə edib və müəllifinin Sayat Nova olduğunu bildirib: “Mən bunu cavabsız qoya bilməzdim. Durdum və onun Azərbaycan mahnısını olduğunu bəyan etdim və onu öz dilimizdə oxudum”.

Tacir Şahmalıoğlu iddia edir ki, bu hadisənin onun duet oxuduğu şəxsə heç bir aidiyyatı yoxdur: “Mənim mahnı oxuduğum adam erməni yox, kürddür. Adı Vledir. Əgər kiminsə şübhəsi varsa, mən onu Azərbaycana, ANS-ə dəvət edə bilərəm. Onda sübut edərəm ki, o, erməni deyil”. Tacir üstündən üç ay keçdikdən sonra Moçskvada çəkilmiş videogörüntülərin yayılmasının səbəbləri ilə bağlı ehtimallarını da dilər gətirib: “Mən 1988-ci ildən Ağdam işğal olunanadək hər gün təmas xəttindəki mövqelərdə olmuşam. Mən sinəmi gülləyə verən oğlanam. Həm ön cəbhədəki əsgərlərimizə mənəvi dayaq olmuşam, həm də özüm vuruşmuşam. Amma bu günə qədər yaxşımı deyən olmadı. Ömrümün 35 ilini musiiqyə vermişəm. Bu vaxtı qədər ad almamışam. İndi mənim adımı belə verirlər, mən görürəm”.

Tacir Şahmalıoğlu hesab edir ki, yayılan videogörüntülər mülahizə irəli sürmək üçün səbəb deyil: “Mənə zəng vururlar və deyirlər ki, zəngimizin səbəbi var. Bu, səbəb deyil axı. Yayılan videogörüntü mənim üçün ləkədir. Mənə qara yaxırlar. Amma quru palçıq divara yapışmaz. Bir daha deyirəm, lazımdırsa, mən o oğlanı dəvət edərəm Azərbaycana. Adı Vledir, mənim dostumdur. O, kürd olsa da, hər dildə oxuyur. Həmin məclisdə ermənicə də oxuya bilər. Amma qonaqlar üçün oxuyur, mənim üçün yox. Mənim nəyimə lazımdır onun hansı dildə oxuması? Selami Şahinin mahnısını oxuyduq birlikdə. Bir kuplet o oxudu, birini də mən. Ortasında da müğam elədim”.

Tacir azərbaycanlı müğənnilərin ermənilərin birlikdə çıxış etməsini qəbul etmədiyini də bildirib: “Bu, düzgün deyil. Təxminən bir il əvvəl mənə Moskvadan bir zəng gəldi. Gördüm ki, danışan ermənidir. And içmək düzgün deyil. Haqq-salama and olsun, mənə dedi ki, sizin pərəstişkarınızıq və toyda oxumaq üçün 50 min dollar təklif elədi. Amma mən imtina etdim ki, erməni toyunda oxumaq üçün verilən 50 min mənə lazım deyil. Lap 100 min də olsa, 1 milyon da olsa, o, mənim üçün bir qəpik yerindədir. Bu gün də efirdə şəhidləri göstərəndə, mən onu göz yaşları ilə qarşılayıram. Sabah böyüklərimiz məsləhət bilsə, mən də çiynimdə avtomat döyüşə getməyə hazıram. Azərbaycan üçün canımı qurban verərəm”.