M.V.Lomonosov adına Moskva Dövlət Universitetinin Bakı Filialı 2010/2011-ci tədris ili üçün bakalavr pilləsinə sənəd qəbulu elan edib.

Müsabiqədə rus bölməsinin abituriyentləri iştirak edə bilər. Lent.az-ın məlumatına görə, bu barədə Tələbə Qəbulu üzrə Dövlət Komissiyasının sədri Məleykə Abbaszadə bildirib. Onun sözlərinə görə, filiala tələbə qəbulu yalnız 4 ixtisas üzrə aparılacaq. Bunlar filologiya, tətbiqi riyaziyyat, kimya və psixologiya ixtisaslarıdır.

Moskva Dövlət Universitetinin Bakı Filialına Azərbaycan vətəndaşları üçün təhsil ödənişsizdir. Məleykə Abbaszadə bildirib ki, universitetin yaratdığı qəbul komissiyası tərəfindən aparılan müsabiqədə orta məktəbin Azərbaycan bölməsini rus dili fənni üzrə “əla” və “yaxşı” qiymətlə bitirən və Tələbə Qəbulu üzrə Dövlət Komissiyasının keçirdiyi test imtahanlarında 350 və daha artıq bal toplayan abituriyentlər də qəbul sınaqlarında iştirak edə bilərlər.

Xatırladaq ki, filiala qəbul üçün ayrılan plan yerlərinin ümumi sayı 100-dür. Bunlardan 25-i filologiya, 25-i tətbiqi riyaziyyat, 25-i kimya, 25-i isə psixologiya ixtisası üçün nəzərdə tutulub.