“Azərbaycanın təhsil müəssisələri bu il qışı daha hazırlıqlı vəziyyətdə qarşılayacaqlar”.

Bunu təhsil naziri Misir Mərdanov jurnalistlərə açıqlamasında deyib. O bildirib ki, Azərbaycanda 7 mindən çox təhsil müəssisəsi var: “Bunların hamısında istilik sistemi ilə bağlı vəziyyətin normal olacağını söyləmək elə də asan deyil. Amma bu il vəziyyət ötənilkindən xeyli yaxşı olacaq”.

Nazir xatırladıb ki, “Təhsil haqqında” qanuna uyğun olaraq əlavə təhsillə bağlı hazırlanan sənəd bu yaxınlarda hökumət tərəfindən təsdiqlənib. Hazırda həmin sənəddən irəli gələn məsələlər icra olunur. M. Mərdanovun sözlərinə görə, ali məktəb, kollec və peşə məktəblərinin müəllimləri üçün ixtisasartırma, yenidən hazırlanma, əlavə təhsil hələ də problem olaraq qalır: “Soruşmaq olar ki, bunlar yox idimi? Əlbəttə var. Amma əslində mövcud mexanizm işləmir. Bu gün elə bir mexanizm hazırlamaq istəyirik ki, onun nəticəsində işimiz düzgün qurulsun. Bu baxımdan biz dünya təcrübəsi, eyni zamanda MDB təcrübəsini öyrənmək istəyirik”.