Kəbə evinin qapısı nə üçün yüksəkdə yerləşir?

Kəbə evinin qapısı yerdən 197 sm yüksəkdə yerləşir. Bu, adi insan boyundan 25-30 sm hündürdür. Zəvvarların dua zamanı əllərinin yalnız qapının aşağı hissəsinə çatması ilə bunu bir daha müşahidə etmək olar. Bəs bunun səbəbi nə ilə əlaqədardır? Sualın cavabı Aişədən nəql olunan bir hədisdə öz əksini tapır. Hədisdə deyilir: "Günlərin biri Peyğəmbərdən (s.ə.s) soruşdum: "Ey Allahın peyğəmbəri, nə üçün Kəbənin qapısı yerdən bu qədər hündürdədir?". Buyurdu: "Qureyş tayfası hələ cahiliyyət dövründə müəyyən şəxsləri Kəbəyə buraxar, istəmədiklərinə isə icazə verməzdi. Əgər onlar hələ də cahiliyyət adət-ənənələrini geridə qoymasaydılar, Kəbənin qapısını yerlə bərabər edərdim".

Göstərilən hədisdən iki mühüm nəticə hasil olur:
1. Kəbə evinin açarları Qureyş tayfasında olurdu. Bu müqəddəs məkanın qapısının yuxarıda olması onların bura daxil olan müəyyən şəxslərə dəyər verməsindən, istəmədikləri şəxslərə isə mane olmaq istəyindən xəbər verir. Yəni Qureyş tayfası Kəbə evinə daxil olmağı bir növ, imtiyaz hesab edir və bu səbəbdən belə bir süni şərait yaradırdı.
2.Peyğəmbər (s.ə.s): "Əgər onlar hələ də cahiliyyət adət-ənənələrini geridə qoymasaydılar, Kəbənin qapısını yerlə bərabər edərdim" buyurmaqla müsəlman ümmətinə hər şeyin bir vaxtı olduğunu öyrətmək istəyir. Çünki vaxtından əvvəl görülən işlər əksər hallarda ya istənilən nəticəni vermir, ya da davamsız olur.

Görəsən, Peyğəmbərdən (s.ə.s) sonra nə üçün bu iş görülmədi? Yoxsa Səudiyyə Ərəbistanında hələ də Qureyş təəssübkeşliyi hökm sürür?

Qeyd edək ki, Kəbə evinin indiki qapısına 300 kq təmiz qızıl işlənib.

Karvan jurnalı