Tələbə Qəbulu üzrə Dövlət Komissiyası (TQDK) ali məktəblərə və 11 illik təhsil bazasından orta ixtisas təhsili müəssisələrinə III ixtisas qrupu üzrə abituriyentlərin imtahan nəticələri yaxın bir necə saat ərzində açıqlamağı nəzərdə tutur.

Komissiyanın mətbuat xidmətinin rəhbəri Elnur Nağızadə APA-ya bildirib ki, abituriyentlər imtahanda topladıqları ballar haqqında həm TQDK-nın internet saytından, həm “Azercell” mobil operatorunun “İmtahancell” xidmətindən öyrənə biləcəklər. TQDK abituriyentlərə ixtisas seçimində kömək məqsədilə “İxtisas seçimi zamanı nələrə diqqət yetirməli” adlı vəsait nəşr edəcək. Orada III ixtisas qrupu üzrə müsabiqədə iştirak hüququ qazanan abituriyentlərin imtahan ballarının paylanmasına dair məlumatlar olacaq.

Qeyd edək ki, III ixtisas qrupu üzrə imtahanlarda 31802 abituriyent iştirak edib. Onlardan 30 nəfəri qaydaları pozduğuna görə imtahandan xaric edilib. İmtahan zalında köçürməyə cəhd edən həmin abituriyentlərin nəticələri ləğv edilib.