Günəş altında işləyənlər istiyə dözə bilmirlərsə, oruc tutmaya bilər

İstidən canı boğazına yığılan paytaxt əhlinə xoş xəbər. Həftənin ikinci yarısı havanın temperaturu aşağı düşəcək. Bu, istidən canı boğazına yığılan paytaxt əhlinə xoş xəbər oldu. Hidrometeoroloji Proqnozlar Bürosunun direktoru Umayra Tağıyeva son günlər ölkə ərazisində hökm sürən anormal istilərin nəhayət başa çatacağını deyir. Həftənin son günləri yağış yağacağı da istisna edilmir.

“Avqustun 20-dən başlayaraq bu günlərə nisbətən havanın temperaturu tədricən aşağı düşəcək. Ölkə ərazisində hava şəraiti nəhayət sərinləşəcək. Bakıda və Abşeron yarımadasında havanın maksimal temperaturu 36-39 dərəcə olacaq. Bakı şəhərinin bəzi ərazilərində istilik 40 dərəcəyə çatacaq. Respublikanın aran rayonlarında 39-41, Naxçıvanda maksimal temperatur 40-42 dərəcə, dağlıq ərazilərdə 26-34 dərəcə isti olacaq”, - deyə Umayra Tağıyeva vurğulayıb.

Yeri gəlmişkən, isti havalar oruc tutanlara da təsirsiz ötüşmür. Nəzərə alsaq ki, müqəddəs Ramazan ayı qızmar istilərə düşüb, bu üzdən oruc tutanlar da bir qədər çətin anlar yaşayır. Din xadimlərinin fikrincə, xəstələr, günəş altında işləyənlər əgər bu istiyə dözə bilmirlərsə, oruc tutmaya bilər. Həkimlər məsləhət görür ki, imsaq zamanı oruc tutanlar elə qidalar qəbul etməlidir ki, sonradan orqanizm çoxlu su tələb etməsin. İftar zamanı qatıq və ayrandan istifadə etmək tövsiyyə olunur. İftardan bir saat sonra isə yaşıl çay içmək məsləhətdir.