Bu il ayrılmış 30457 plan yerinə 27700 abituriyent qəbul olub

Tələbə Qəbulu üzrə Dövlət Komissiyası 2010/2011-ci tədris ili üçün ali təhsil müəssisələrinə qəbulun nəticələrini avqustun 4-də saat 21:00-da Komissiyanın internet saytında yerləşdirilib. Məsələ ilə əlaqədar TQDK-nın mətbuat xidmətinin rəhbəri Elnur Nağızadə ANS PRESS-ə açıqlamasında abituriyentlərin artıq dünəndən imtahan nəticələri barədə məlumatı mobil telefonla “İmtahancell” xidməti vasitəsilə də öyrənə bildiklərini vurğulayıb. Ali təhsil müəssisələrinə qəbul olmuş abituriyentlərin siyahısı avqustun 6-da «Abituriyent» jurnalının VI sayında dərc olunacaq.

Qeyd edək ki, bu il ayrılmış 30457 plan yerinə 27700 abituriyent qəbul olub. Həmçinin 53 nəfər yüksək səviyyəli beynəlxalq müsabiqə qalibi, olimpiada, dünya və Avropa çempionu ali məktəbə müsabiqədən kənar qəbul edilib. Belə ki, 2757 vakant yer qalıb. Vakant yerlərin 543-ü I, 472-si II, 1509-zu III, 233-ü isə IV ixtisas qrupu üzrədir.

Boş qalan yerlərə ixtisas seçimi avqustun 6-dan 10-dək internet vasitəsilə aparılacaq. Abituriyentlər elektron ərizədə ali təhsil müəssisələrinin boş qalan plan yerlərinin ixtisasları ilə yanaşı orta ixtisas təhsili müəssisələrinin ixtisaslarının da kodlarını göstərə bilərlər.