Yunan-Roma güləşçimiz Rəsul Cunayev Avropa çempionu olub Bolqarıstanın Samokov şəhərində gənclər arasında keçirilən Avropa birinciliyi başa çatıb. Yarışın son günü yunan-Roma güləşçiləri mübarizəni davam etdirib. 55, 66, 84 və 120 kq çəkidə mübarizə aparan güləşçilərimizdən yalnız Rəsul Cunayev (66 kq) fəxri kürsünün ən yüksək pilləsinə qalxa bilib.
Azərbaycan Güləş Federasiyasından verilən məlumata görə, təmsilçimiz ard-arda moldovalı İon Luçitanı (7:0, 1:0), latviyalı Kristaps Kalnakarklisi (5:1, 6:0), erməni Gevorg Sahakyanı (5:1), xorvat Dominik Etlingeri (5:0) hesablı təmiz qələbələrlə məğlub edərək finala yüksəlib. Finalda gürcü Saçino Davitaia üzərində də inamlı qələbə qazanan (7:0, 0:2, 7:1) Rəsul Cunayev Avropa birinciliyinin qalibi olub.
Beləliklə, Azərbaycan Güləş Federasiyası Hakimlər Kollegiyasının sədri Əjdər Cəfərovun da hakim kimi ölkəmizi təmsil etdiyi Avropa birinciliyində hər üç yığmamız ümumilikdə 10 medal qazanıb və güləş tariximizdə yeni bir tarix yazıb.