Bakı şəhərinin “Gənclik” metro stansiyası (Qələbə meydanı) yaxınlığında inşa olunan yeraltı tunel kompleksinin 2013-cü ildə istifadəyə veriləcəyi gözlənilir.

Bu barədə “APA-ECONOMICS”ə kompleksin inşasını həyata keçirən “Akkord İnşaat-Sənaye” ASC-dən məlumat verilib.

Hazırda Qələbə meydanında tikintisi davam etdirilən bu tunel kompleksinə 5-7 tunelin inşası daxildir: “Eyni zamanda, tunel kompleksinin tikintisi ilə əlaqədar “Genclik” metro stansiyasının çıxışları bir qədər dəyişdiriləcək. Bundan başqa, Qələbə meydanında 3 mərtəbəli yeraltı avtomobil dayanacağı və iki yeraltı keçid də inşa olunacaq”.

Qeyd edək ki, sözügedən tunel kompleksi müxtəlif istiqamətlər üzrə inşa olunacaq. Belə ki, tunel kompleksi Atatürk və Vaqif prospektləri, həmçinin Təbriz və Atatürk prospektlərini Əhməd bəy Ağaoğlu küçəsi ilə birləşdirəcək. Bundan başqa, Təbriz prospekti ilə hərəkət edən avtomobillər “Gənclik” dairəsinə girmədən Dərnəgül şossesinə çıxa biləcək. Alternativ yollarla Fətəli xan Xoyski prospektinə də çıxış təmin olunacaq. Vaqif prospekti ilə hərəkət edən avtomobillər Fətəli xan Xoyski prospekti ilə hərəkəti davam etdirərək avtodayanacağı keçəcək və Atatürk prospektinə çıxa biləcək. Həmçinin, Həsən Əliyev prospekti boyunca tunel keçəcək.