Bu gün Gəncənin 2504 illiyinə həsr olunmuş “Gəncə günləri” tədbirlərinə start verilib.

APA-nın Qərb bürosunun məlumatına görə, tədbirlər çərçivəsində ilk öncə şəhər rəhbərliyi və ictimaiyyətin nümayəndələri Heydər Əliyevin abidəsini ziyarət ediblər. Daha sonra Cavad xanın və Nizami Gəncəvinin məqbərələri ziyarət olunub. Atlı carçılar şəhəri dolaşaraq əhalini sentyabrın 23-də şəhərin 2504 illiyinə həsr olunmuş tədbirlərə qatılmağa dəvət ediblər. Milli Məclisin birinci vitse-spikeri Ziyafət Əsgərov jurnalistlərə verdiyi açıqlamada Gəncə sakinləri ilə birlikdə bu bayramı qeyd etməkdən qürur duyduğunu deyib: “15 il bundan əvvəlki Gəncə ilə indiki Gəncə arasında böyük fərq var. Mən əminəm ki, nə qədər ki, dünya var, Gəncə də var olacaq”.

Tədbirlərə qatılmış Türkiyə Cümhuriyyətinin Gəncədəki konsulu Haluk Ağca jurnalistlərə ölkəsinin bu şəhərdə ilk konsulu olmasından şərəf duyduğunu bildirib: “Öncə Gəncədəki ilk baş konsul olduğum üçün şərəf duyuram. Ayrıca konsul fəaliyyətimə Gəncənin 2504 illiyinin qeyd olunduğu bir gündə başlamaq mənə qürur verir. Çox qısa vaxtdır ki, Gəncədəyik, amma bu şəhəri çox sevdik, sizlərin yanınızda olmaqdan şərəf duyduq”.

Tədbirlər çərçivəsində Nizami Gəncəvinin heykəli önündə Nizami poeziya gecəsi keçiriləcək, Mir Cəlal Paşayevin ev muzeyində konsert proqramı təşkil olunacaq. Gəncə şəhərinin 2504 illiyi ilə bağlı təşkil olunan tədbirlər planı sabah şəhərin baş meydanında təşkil olunacaq konsert proqramı ilə başa çatacaq.