Əfran İsmayılov Futbol Tarixi və Statistikaları Federasiyasının siyahısına düşüb

Beynəlxalq Futbol Tarixi və Statistikaları Federasiyası (İFFHS) 2010-cu ilin ən məhsuldar futbolçularının siyahısını açıqlayıb. Siyahıya ən azı 6 qol vuran futbolçuların adları salınıb. Ən məhsuldar futbolçular siyahısında ilk sırada 15 qola imza atmış İspaniyanın "Barselona” klubunun futbolçusu David Vilya yer alır.

Sonrakı yerlərdə isə hərəyə 13 qol vuran "İnter”in kamerunlu futbolçusu Samuel Eto'o və "Atletiko”nun uruqvaylı üzvü Dieqo Forlan yer alır. İFFHS-in tərtib etdiyi siyahıya həmyerlimiz olan futbolçu da daxil edilib. "Qarabağ” klubunun üzvü Əfran İsmayılov 2010-cu ildə vurduğu 6 qolla ən məhsuldar futbolçuların siyahısında 57-ci sırada yer alıb.

Əfran İsmayılov məşhur futbolçular İvitsa Oliç və Ueyn Runi ilə birlikdə 6 qola imza atıb. Türkiyə yığma komandası və "Qalatasaray” klubunun futbolçusu Arda Turan isə ən məhsuldar futbolçuların siyahısında 21-si sırada yer alıb.