Təhsil Nazirliyi prezidentin tapşırığı ilə “2007-2015-ci illərdə azərbaycanlı gənclərin xarici ölkələrdə təhsil almasına dair dövlət proqramı” çərçivəsində təhsil alan gənclərin müvafiq işlə təmin olunması barədə sənəd layihəsi hazırlayıb.

APA-nın məlumatına görə, təhsil naziri Misir Mərdanov bildirib ki, yaxın vaxtlarda bu sənədin hökumət tərəfindən təsdiqlənəcəyi gözlənilir: “Məqsədimiz odur ki, dövlət proqramı çərçivəsində xaricdə təhsil alan azərbaycanlı gənclər əvvəlcədən hansı işlərdə işləyəcəklərini və bunun müqabilində nə qədər əməkhaqqı alacaqlarını bilsinlər”.

M. Mərdanov deyib ki, xarici ölkələrdə təhsil alan azərbaycanlıların sayının 10 minə yaxın olduğu bildirilsə də, bu, dəqiq rəqəm deyil. Nazir bu rəqəmin daha çox olduğu fikrindədir. Onun sözlərinə görə, artıq dövlət proqramı çərçivəsində 43 gənc xarici ölkələrdə təhsilini başa vurub: “Onlardan 2-si orduya cəlb edilib, qalanları isə yaxşı işlə təmin edilib. Bu proqram çərçivəsində xaricdə təhsil alan və Azərbaycana qayıdan gənclər Dövlət Qulluğu Komissiyasına müraciət etdikdən sonra imtahansız dövlət qulluğuna daxil olmaq hüququ qazanırlar”.