Bu gün Cənubi Afrika Respublikasında keçirilən futbol üzrə dünya çempionatında daha 3 oyun baş tutacaq.

D qrupunda bir oyun, E qrupunda isə iki oyun keçiriləcək.

19 iyun

16.30 Hollandiya - Yaponiya (E qrupu)
19.00 Qana - Avstraliya (D qrupu)
23.30 Kamerun - Danimarka (E qrupu)

Dünən isə maraqlı oyunlar baş tutub..

İngiltərə millisi Əlcəzair yığması ilə bacarmadı

İngilislər iki oyundan cəmi iki xal toplaya biliblər.

Futbol üzrə Dünya Çempionatında İngiltərə millisi Əlcəzair yığması ilə heç-heçə oynayıb. İngilislər rəqibin qapısına qol vura bilməyiblər və qarşılaşmada hesab 0:0 olub. Bununla da İngiltərə millisi iki oyunda cəmi iki xal toplayıb.

İngilislər oyunun favoritləri hesab olunsalar da, qarşılaşma bərabər mübarizə şəraitində keçib və heç bir ciddi təhlükəli vəziyyət yaranmayıb. Bununla belə, Əlcəzair millisi topa sahib olma səviyyəsində görə rəqibdən üstün olub.

Qeyd edək ki, ötən gün Sloveniya və ABŞ milliləri də heç-heçə (2:2) oynayıblar. İki turdan sonra sloveniyalıların 4, ABŞ və İngiltərə millilərinin hər birinin 2, Əlcəzair yığmasının isə bir xalı var. Sonuncu turda Sloveniya millisi İngiltərə, ABŞ yığması isə Əlcəzair millisi ilə qarşılaşacaq.

Serbiya almanları məğlub etdi.

CAR-da keçirilən futbol üzrə dünya çempionatı çərçivəsində «D» qrupunda yer almış iki komanda – Almaniya ilə Serbiya qarşı-qarşıya gəlib.

Oyun gözlənilənlərin əksinə Serbiyanın 1:0 hesablı qələbəsi ilə başa çatıb.
Qarşılaşma almanların hücumçusu Miroslav Klozenin 37-ci dəqiqədə kobud oyuna görə ikinci sarı vərəqəni alaraq, meydanı tərk etməsi ilə yadda qalıb. Bundan bir dəqiqə sonra Serbiya yığması hesabı açıb. 38-ci dəqiqədə Milan Yovanoviç fərqlənib.

Oyunun 60-cı dəqiqəsində almanlar hesabı bərabərləşdirməyə yaxşı şans qazanıb. Serbiya yığmasının qapısına təyin olunmuş penaltini Lukaş Podolski dəyərləndirə bilməyib. Onun zərbəsini serblərin qapıçısı qaytarıb.