Təhsil Nazirliyi (TN) orta məktəblərdə bu il keçirəcəyi buraxılış imtahanların keçirilməsi ilə bağlı bəzi yeniliklər edib.

Nazirliyin Monitorinq və Qiymətləndirmə şöbəsinin müdiri Təranə Hacıyeva APA-ya bildirib ki, imtahanda şəffaflığı artırmaq məqsədi ilə ictimai nəzarət gücləndirilir. Bu məqsədlə bu ilki buraxılış imtahanlarında Valideyn Müəllim (VM) assosiasiyalarının üzvləri imtahan rəhbəri və nəzarətçisi kimi iştirak edə biləcəklər. Artıq valideynlər TN-nin bu il keçirdiyi yoxlama imtahanlarında imtahan rəhbəri və nəzarətçisi kimi iştirak ediblər.

T.Hacıyeva deyib ki, buraxılış imtahanlarının keçirilməsi ilə bağlı bəzi texniki yeniliklər də olacaq: “İndiyədək şagirdlərə imtahanın keçiriləcəyi vaxt və yer elan edilirdi. Bəzən məktəb direktoru məlumatı uşaqlara səhv verirdi, yaxud uşaqlar özləri məlumatı səhv başa düşürdülər. Bu da şagirdlər arasında çaşqınlıq yaradırdı. Ona görə də bu ildən artıq şagirdlərə imtahanın keçirilməsi ilə bağlı vəsiqə təqdim ediləcək”.