2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı çərçivəsində bu il 200-ə yaxın tələbə təhsil almaq üçün xarici ölkələrə göndəriləcək.

Trend-in məlumatına görə, bu barədə "Xaricdə təhsil alan ve məzun olmuş azərbaycanlı gənclərin VIII beynəlxalq Forumu"nda çıxışı zamanı gənclər və idman nazirinin müavini İntiqam Babayev bildirib.

"İndiyə qədər 500-ə yaxın gənc bu proqramdan yararlanıb, ABŞ, Rusiya, Yaponiya, Fransada və digər ölkələrdə təhsil alırlar. Son beş ildə belə tələbələrin sayı iki dəfə artıb", - Babayev əlavə edib.

"2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı" Azərbaycan Respublikası Prezidentinin 2007-ci il 16 aprel tarixli 2090 saylı Sərəncamı ilə təsdiq edilib.