Bakı Şəhəri üzrə Təhsil İdarəsi (BŞTİ) yaxın günlərdə paytaxtdakı orta məktəblərdə reydlərə başlayacaq. İdarənin İctimaiyyətlə əlaqələr sektorunun müdiri Zəminə Əliqızı APA-ya bildirib ki, noyabr ayı ərzində keçiriləcək reyd zamanı məktəblərdə sənədləşmə işlərinin aparılması, şagird və müəllimlərin davamiyyəti, şagirdlərin məktəbli geyiminə riayəti, I-IV sinif şagirdləri arasında vahid məktəbli geyiminin tətbiqi ilə bağlı vəziyyət öyrəniləcək. Z. Əliqızı deyib ki, bu il sentyabrın 15-dən I-IV sinif şagirdlərinin vahid məktəbli geyiminə keçidi məcburiləşdirilsə də, valideynlərin xahişi ilə BŞTİ bu prosesin tamamlanması üçün qoyulan vaxtı noyabrın 1-dək uzadıb: “”Bakı Tikiş” Açıq Səhmdar Cəmiyyətinin bizə verdiyi son məlumata görə, I-IV sinif şagirdləri üçün onların sayı qədər, yəni 120 min geyim tikilib. Onlardan 10 mini hələ alınmayıb. Amma bu, o demək deyil ki, 10 min şagird vahid məktəbli geyiminə keçməyib. Ola bilər ki, onlar Çin istehsalı olan və ya başqa yerlərdə tikilən geyimləri alıblar. Ümumilikdə vahid məktəbli geyimi ilə bağlı vəziyyəti bu reydlərdən sonra açıqlaya biləcəyik”. Z. Əliqızının sözlərinə görə, reyd zamanı hər hansı şagirdin vahid məktəbli geyimindən istifadə etməməsi aşkarlanarsa, o, dərsdən uzaqlaşdırılmayacaq. İdarə vahid məktəbli geyiminə keçməyənlərə bir daha tövsiyə edəcək ki, bu proses məcburi olduğu üçün yeni geyim alsınlar.
|