Azərbaycan Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə yardımı ilə “Türkdilli Dövlətlərlə Dostluq və Mədəni Əlaqələr Cəmiyyəti” ictimai birliyi Azərbaycanda təhsil alan əcnəbi tələbələrə Azərbaycanın milli adət-ənənələrinin tanıdılması ilə bağlı yeni layihənin həyata keçirilməsinə başlayacaq.

APA-nın məlumatına görə, “Türkdilli Dövlətlərlə Dostluq və Mədəni Əlaqələr Cəmiyyəti” ictimai birliyinin Azərbaycan Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə yardımı çərçivəsində Şuraya təqdim etdiyi “Azərbaycanda təhsil alan əcnəbi tələbələrə Azərbaycanın milli adət-ənənələrinin tanıdılması” layihəsi 2010-cu ilin dekabr ayında elan edilən müsabiqədə qalib gəlib. Layihədə 60 əcnəbi tələbə iştirak edəcək və layihə iki mərhələdən ibarət olacaq. Layihənin birinci mərhələsində Azərbaycan tarixi və Qarabağın işğalı haqqında layihə iştirakçılarına ətraflı məlumat veriləcək. İkinci mühazirədə Azərbaycan xalqının mədəniyyəti, milli adət-ənənələri və işğal olunmuş ərazilərdəki abidələrimiz haqqında geniş məlumat veriləcək.

Layihənin davamı olaraq tələbələr Quba şəhərindəki soyqırımı məzarlığını və Qubanın tarixi yerlərini ziyarət edəcəklər. Layihə 3 ay müddətində davam edəcək. Layihənin sonunda tələbələr arasında Azərbaycan haqqında təəssüratları haqqında sorğu keçiriləcək. Tələbələrə Azərbaycanın tarixini və mədəniyyətini nümayiş etdirən bukletlər və kitabçalar təqdim ediləcək