Təxminən 10 ildən sonra Azərbaycanda hər şagirdin netbukla təmin edilməsi mümkün olacaq. APA-nın məlumatına görə, bunu jurnalistlərə açıqlamasında təhsil naziri Misir Mərdanov deyib. O bildirib ki, 2005-ci ildə bu işə başlayanda Azərbaycanda hər 1042 şagirdə 1 kompüter düşürdü. İndi isə hər 29 şagirdin 1 kompüteri var.
O qeyd edib ki, indiyədək Azərbaycanda İKT-nin təhsildə tətbiqi barədə 2 Dövlət Proqramı həyata keçirilib. Bu proqramlardan birincisi iki il ərzində 2007-ci ilədək reallaşdırılıb. 2008-ci ildən isə ölkə başçısının təsdiq etdiyi ikinci Dövlət Proqramı icra olunmaqdadır.
Nazir gələn ildən orta məktəb şagirdlərinə qızıl və gümüş medallar veriləcəyini söyləyib. O qeyd edib ki, özəlləşdirməyə çıxarılan bağçaların hamısı öz profili üzrə işləmir: “Amma gələcəkdə yəqin ki, işləyəcək”.
M. Mərdanovun sözlərinə görə, təhsildə informasiya-kommunikasiya texnologiyalarından istifadə halları genişlənir: “Hazırda orta məktəb müəllimlərinin işə qəbulu kompüterlə həyata keçirilir. Gələcəkdə məktəb direktorlarının və digər əməkdaşların da işə qəbulu zamanı texnologiyadan istifadə ediləcək”.