Azərbaycanda 2011-2012-ci tədris ili üçün qəbul imtahanlarına dair yeniliklər barədə qərarlar qəbul olunub.

Bu barədə APA-ya Tələbə Qəbulu üzrə Dövlət Komissiyasından (TQDK) məlumat verilib.

Dəyişikliklərə əsasən 3-cü ixtisas qrupuna daxil olan “Beynəlxalq münasibətlər” və “Regionşünaslıq” ixtisasları 2011-ci ildən 2-ci ixtisas qrupuna keçirilir.
2011-2012-ci illər tədris ilində ali məktəblərin magistratura pilləsinə qəbul imtahanlarına ərizə qəbulu və qəbul imtahanlarının 1-ci mərhələsinin 2011-ci ilin fevral ayında aparılması nəzərdə tutulur. Qəbul qaydalarına uyğun olaraq, imtahanın birinci mərhələsində bakalavrların ümumi intellekt səviyyəsi (məntiqi təfəkkür), xarici dili və informatika fənni üzrə bilikləri yoxlanacaq.
Abituriyentlərin qəbul imtahanlarına səmərəli hazırlaşmalarına kömək məqsədi ilə 2011-ci ilin yanvar ayında Bakıda, eləcə də müxtəlif bölgələrdə bir sınaq imtahanı keçiriləcək.
Növbəti sınaq imtahanlarının isə müntəzəm olaraq, 2011-ci ilin aprel ayından keçirilməsi nəzərə tutulur.

Daha sonra qeyd olunub ki, 2011-ci ildə keçiriləcək qəbul imtahanlarında riyaziyyat fənni üzrə test tapşırıqlarının bəziləri açıq tipli olacaq.

O da bildirilib ki, Nazirlər Kabinetinin qərarına uyğun olaraq, rezidenturaya qəbul TQDK tərəfindən aparılacaq.