Ermənilərin Azərbaycan mədəniyyət nümunələrini mənimsəməsi halları davam edir.

Bu dəfə “Aşıq Qərib” dastanı ermənilərin hədəfinə tuş gəlib. Azərbaycan folklorunun ən tanınmış nümunələrindən olan “Aşıq Qərib” dastanı UNESCO-nun qeyri-maddi irs siyahısına erməni nümunəsi kimi təqdim olunub.

Lent.az-ın məlumatına görə, bunu mədəniyyət və turizm naziri Əbülfəs Qarayev bu gün Muzey Mərkəzində keçirdiyi mətbuat konfransındakı çıxışı zamanı deyib. Nazir bildirib ki, bu faktla dünən UNESCO-nun rəsmi saytında qarşılaşıb: “Bizim xalqa məxsus olan bu dastan erməni nümunəsi kimi UNESCO-nun qeyri-maddi irs siyahısına daxil olunması üçün təqdim edilib. Ermənilər bu hərəkətlərini hələ də davam etdirirlər. Azərbaycan ictimaiyyəti və mətbuatı bu məsələdə ayıq-sayıq olmalıdır. Bu, yalnız bir nazirliyin öhdəsindən gələ biləcəyi iş deyil. Bunu ictimaiyyətin təhlilinə, geniş müzakirəyə çıxarmaq lazımdır”.

Ə. Qarayev qeyd edib ki, bu faktla bağlı UNESCO-ya rəsmi müraciət ünvanlanacaq.