“Söhbət ali məktəblərdə hansısa imtahanın ləğvindən getmir. Qərara gəldik ki, əgər hər hansı tələbə lazım olan krediti toplayıbsa, ona diplom vermək olar”.

APA-nın xəbərinə görə, bunu jurnalistlərə açıqlamasında Azərbaycanın təhsil naziri Misir Mərdanov Azərbaycan Dövlət Dillər Universitetində (ADDU) dövlət imtahanı və buraxılış işinin tamamilə ləğv olunması barədə məlumatlara münasibət bildirərkən deyib. Bu yeniliyin mətbuatda düzgün formada təqdim olunmadığını söyləyən nazir bəyan edib ki, nəzərdə tutduqları yenilik - tələb olunan krediti əvvəlcədən toplayan tələbələrə diplomun imtahansız verilməsi ilk olaraq ADDU-da tətbiq ediləcək.

M. Mərdanov orta məktəbi qızıl və gümüş medallarla bitirəcək şagirdlərin buraxılış imtahanlarından azad edilməyəcəyini də söyləyib: “Buraxılış imtahanları keçirildikdən sonra qızıl, gümüş alanların siyahısı bəlli olur. Bu halda onları buraxılış imtahanından azad etmək olmaz. Belə məzunlara üçün hələlik ciddi güzəştlər də nəzərdə tutulmayıb”.