“Sparta” klubunun hücumçusu yüksək məhsuldarlıq nümayiş etdirib

Hollandiyanın ikinci dvizionunda futbol tarixində nadir görünən məhsuldarlıq qeydə alınıb. Belə ki, Niderlandın “Sparta” klubunda çıxış edən hücumçu Yohan Vaskamp komandasının “Omniuorld”la qarşılaşmasında yüksək məhsuldarlıq nümayiş etdirərək 8 qola imza atıb. Ümumilikdə isə hesab 12:1 - “Sparta”nın xeyrinə başa çatıb.

Dünya futbol tarixində bir oyunda ən çox qol vuran futbolçu isə fransalı Stefan Stanisdir. Fransız forvard “Rasinq Klab de Lans” klubunun heyətində 1942-ci il 13 dekabr tarixində keçirilən matçda 16 dəfə fərqlənməyə macal tapıb. Stanis bu göstərici ilə hələ ki, rəqibləri üçün əlçatmazdır.

Maraq üçün qeyd edək ki, futbol tarixində ən böyük hesab 1885-ci ildə Şotlandiya Kuboku çərçivəsində baş tutan “Abrout” – “Bon Akkord” matçında qeydə alınıb. “Abrout” kollektivi rəqibini 36:0 hesabı ilə məğlubiyyətə uğradıb.
Ən tez het-trik isə 1942-ci ildə baş verib. “Blekpul”un futbolçusu Efraim Doddz “Tranmer Rovers” kollektivi ilə görüşdə iki dəqiqə yarım ərzində üç qola imza atıb.