Sinqapurda Yeniyetmələrin I Yay Olimpiya Oyunları davam edir.

Yarışların üçüncü günündə komandamız aktivinə dördüncü qızıl medalı yazdırıb. Komandamızın heyətində Nicat Rəhimov fərqlənib. Ağır atletika yarışlarında o Çin və Kuba idmançılarını geridə qoyaraq, Olimpiya çempionu adını qazanıb.

Yeniyetmələrin I Yay Olimpiya Oyunlarında Azərbaycan yığması daha bir qızıl medal qazanıb. Bu uğura komandamızın heyətində ağırlıqqaldıran Nicat Rəhimov (69 kq) imza atıb.

Birdən qaldırmada 134 kq çəkinin öhdəsindən gələn idmançımız təkanla 161 kq çəkini ram edib. Hər iki yanaşmada bütün rəqiblərini qabaqlayan Rəhimov ümumi nəticədə 295 kq qaldıraraq, Olimpiya çempionu adına layiq görülüb.

Qeyd edək ki, ağırlıqqaldıranımız komandamızın aktivinə 4-cü qızıl medalı yazdırıb. Olimpiadanın ilk 2 günündə isə 3 idmançımız qüvvəsini sınayıb və hər üçü də fəxri kürsünün ən yüksək pilləsinə qalxıb.